Copernicus: Prilli 2026, muaji i tretë më i ngrohtë i regjistruar ndonjëherë
Prilli i vitit 2026 është renditur si prilli i tretë më i ngrohtë i regjistruar ndonjëherë në nivel global, duke konfirmuar vijimin e trendit të fortë të ngrohjes globale.
Temperaturat globale mbi mesataren historike
Sipas të dhënave të publikuara nga shërbimi meteorologjik i Bashkimit Evropian, Copernicus Climate Change Service, temperatura mesatare e ajrit në sipërfaqen e Tokës gjatë muajit prill arriti në 14.89 gradë Celsius.
Kjo temperaturë rezulton 0.52 gradë Celsius mbi mesataren e periudhës 1991-2020. Rekordi për prillin më të nxehtë mbahet nga viti 2024, ndërsa viti 2025 renditet i dyti. Raporti thekson se temperatura e prillit 2026 ishte gjithashtu 1.43 gradë Celsius më e lartë krahasuar me mesataren e periudhës para-industriale 1850-1900, një tjetër tregues i ndikimit të ndryshimeve klimatike në nivel global.
Europa me temperatura mbi normalen sezonale
Edhe Europa ka regjistruar temperatura më të larta se normalja sezonale. Temperatura mesatare mbi territorin europian gjatë prillit ishte 8.88 gradë Celsius, ose 0.50 gradë mbi mesataren e viteve 1991-2020.
Kjo e bën prillin 2026 muajin e dhjetë më të ngrohtë të regjistruar ndonjëherë në kontinentin europian. Rekordi për Europën vijon të mbahet nga prilli i vitit 2018.
Temperaturat e detit pranë niveleve rekord
Sipas Copernicus, temperaturat e sipërfaqes së detit vijojnë të mbeten shumë të larta. Gjatë prillit 2026, temperatura ekstrapolare e sipërfaqes së detit arriti në 21 gradë Celsius, niveli i dytë më i lartë i regjistruar ndonjëherë për këtë muaj. Rekordi absolut vazhdon të mbahet nga viti 2024, periudhë e ndikuar fort nga fenomeni klimatik El Niño.
Paralajmërim për një tjetër El Niño
Ekspertët paralajmërojnë se një tjetër fenomen El Niño mund të zhvillohet gjatë muajve të ardhshëm, çka mund të ndikojë në rritje të mëtejshme të temperaturave globale dhe në intensifikimin e fenomeneve ekstreme klimatike në pjesë të ndryshme të botës.
k.jpg)